صبحي قاعد جمب صبايا بالجامعة
بيقول صبحي:
هل خمس صبايا هدول متجمعات مثل الهم على القلب، طبعاً الرؤوس إلى الأسفل، والآذان والأفواه مفتوحة على وسعها، والعيون بتراقب حركة الكل، وعلى الطاولة كوم سندويش. الصبايا عاملين روجيم من فئة XXL، والقال والقيل يدور بينهن.
سوسو (سميرة سابقاً)
اسمعت إنه خديجة راحت على أستاذ الكيميا على مكتبه، وقعدت عنده نص ساعة، وشميتلك خبر إنه راح يحطلها بالمادة 80% يا ستي، العلامات لناس وناس… بصريح العبارة فش خبر يسر البال.
فوفو
لا تجيب بأي كلمة لأنها فاضية للفغم من السندويشة.
كوكو (كوثر قبل ما تفوت الجامعة)
“إنت مو عارفة إنها لابسة بلوزة جديدة لونها بنزرقي ومفصليتها تفصيل، وبتعرفي إنها بتحط على عيونها لنسرز، ومع شوية مكياج بتطلع حلوة.”
وبقلبها بتحكي: مثل القرد الممعوط! يعني مكيفة على حالها وهي مشرشحة، وإحنا عارفين مين أهلها، شحادة بنت شحادين.
فوفو (معدل من فاطمة)
شوفتوا وفاء كانت واقفة مع “عقلة الهامل”، ولما تحكيلها ليش كنتِ واقفة معه بتذوب خجل وبتحكيلك: أنا ما بوقف مع شباب. ومبارح لقيتها بالحمام بتدخن، يا ستي عالأخلاق، فعلاً إلي استحوا ماتوا طخ.
جيجي (اختصار لجميلة)
يا ختي سالم إله أسبوع بيطلع علي وودالي كوثر حتى تحكي معي، بس فشر بعينه! وله لأنشفله دمه حتى يزبطني، بفكرني هبلة وخوثة مثل كوثر.
فوفو
خليك على هالرشة، خطيتك برقبة أختك فوفو، الشباب هالأيام ما بيجوا إلا بالدعس.
عاشه (تعديل محلي للهجة، بالأصل عائشة)
ولما قعد بجنبي بالباص حكالي: عاشه والله أنا بعزك معزة خاصة، يعني أكثر من معزة الصداقة والزمالة، يعني زي ما تقولي بودك أو عزيزة علي كثير، أو بعبارة ثانية باستلطفك وبريدك، وخالتي سألتني عنك وبنت عمي شاط شعر راسها لما سمعت سيرتك، وأمي بتحبك وخواني بيحبوك… وأنا باحترمك.
تنهد لمدة 45 ثانية تشفط بها كل الهوا بالكفتيريا…
العمى يضربه، ما بيعرف يحكي بحبك!
وتطبطب كوكو على كتفها معزية:
ولا يهمك يا حبيبتي، هو لوح وحياته ملاخمة، ومعاه بيحكيلك بحبك خطيتك برقبتي… احلقيله على الناشف إريحلك.
