حكي شبـــــــاب
كلمات ومصطلحات دارجة
طقع
من الجذر “طقع” أي عمل ضجة ودوشة، وهو مصطلح دارج لوصف حالات كثيرة منها البنت الحلوة والدلوعة، الفكرة الشاذة والممنوعة، والنصيحة الفخمة والمسموعة…
فايع
عائدة على الشب الذي يغطي شعره بأكبر كتلة ممكنة من الجل، ويسحل بنطلونه الجينز لأقل مسافة ممكنة باتجاه كندرته ذات الوزن العالي، ويشحد موبايل أخوه “من دون خط شغال طبعاً”، ويسرق مفتاح سيارة أبوه ويرتدي زرد برقبته على شكل جنزير بسكليت.
مايع أو دلوعة
وهو شب بخاف من خياله ولهجته قريبة للهجة صعايدة لبنان، ويعشق الهمبورغر وبيموت على سنكرز، وكل حكيه: ماما حكتلي… وبابا إلي، وبخاف من العتمة والبعبع، والصرصور بشكله هزة أرضية، وبشرب حليبه قبل ما يبرد، وما بنام إلا بهز وقصة تحكيها إله الماما.
هلأ أو هسع
بالأصل كانت “هذه الساعة”، ولكن خلال دخولنا عصر التكنولوجيا ومتابعتنا للفضائيات اللبنانية ومن خلال عشقنا لنانسي عجرم وذوباننا بماء هيفاء وهبي تحولت الكلمة وأصبحت تنعلك بألسنتنا بهذه الطريقة.
مفاجيع
جمع فجع، أي ما خلا أشي يعتب عليه، وسخطه على التكنولوجيا ومصيبة على الريموت كنترول، ومعلم عالموبايل، وفلته على الإنترنت، وزلمة على أكل الجيز برغر، وما في حدا مثله بالموضة وبيلبس أي أشي بيلبسوه الأجانب.
